خذ المآيك و فضفض لنا عن طفولتك .,*

( خذ المايك وفضفض عن طفولتك بلا حدود )

يعني تتخيل عندك المايك وجدامك الاعضاء وكلهم منصتين لك
وتتكلم عن طفولتك من بدايتها اذا تبي من الولاده ومن المهد شو ماتبى اكتب شقاوتك برائتك احلامك طموحك
زعلك فرحك مواقف حصلت لك سواء مواقف شقيه منك او مواقف حزينه شنو ماكانت وشنو كنت تحب وشنو كنت تكره
مواقف بالمدرسه ومواقف مع الطلاب ومواقف مع المدرسين مواقف مع اهلك ومواقف في حياتك بشكل عام

نبغى يكون فيه تفجير لشخصيتك الي كلنا راح ننجذب لما نسمعها
ونتعرف اكثر عليك/ش
اكتب لنا اناشيد تحبها وشنو القصص الي كنت تقراها وجم مرة عاقبك الوالد وليش وكيف استفدت من العقاب

يعني كل شي تحب تذكره بمرحلة الطفوله مرورا بالمراهقه
ونهاية عند بداية مرحلة الشباب ووقوفك للطريق الصح
وراح يكون مع المايك مدة يومين كامل تكتب فيه على راحتك
نبى نشوف الجانب المرح والشقاوه والطفوله والبرائه في شخصيتك والموضوع

مافيه اسئله واجوبه من قبل الاعضاء يعني انت القائد/ه بالكلمه والمايك معك وتحدد شو تبى
تكتب مواقف كثيره وذكريات ورغبات واشياء تكرهاوتحبهها وطموحاتك على مدار تحولاتك العمريه

ممكن اضافة حكم ,اشعار, صور تحبها او صور شخصيه لك /لش

وراح تختار بعدك عضو / عضوه بعد ماتخلص مدتك الي هي يومين
يارب اكون وصلت لك الفكره صح لكم

و اول ضيف معانا اهو

نور القمر

تسلمي نغمه على الطرح الرائع
بس ليش انا الاول يعني لازم احراج

بسم الله الرحمن الرحيم
يالله نبدا
احم احم
كل شخص بي هالدنيا مر بمواقف بمختلف انواعها كانت مفرحه او محزنه
في طفولتي :
يعني ايش بتتوقعو غير الشقاوه يعني ربشه وفوضه لاخر درجه وهذا طبع اكثر الاشخاص في هالمرحله تقريبا تكون حياتهم على هذا النهج لان هذي غريزه في الاطفال يميلو الي الشقاوه ولازم كل يوم يجي احد يشتكي عليك البيت وتحصل كم صطار قبل النوم لكي يساعدك على النوم بدري هههه ومن اول الصبح حواطه من بيت لبيت وما ترجع الا علشان تتغدى يعني بالمختصر تعبي بترول واذا عاد تسبحت تسوي خير في نفسك هههه وترجع تكمل الهياته والحواطه لين يجيك المغرب وترجع البيت وتحصل كم طراق وعاد تبكي وتنام بالمره (منوم بطريقة العمانين)
من كثر شقاوتي ما اظن في مكان في جسمي ما فيه خياطه واظن الكل يعرف مركز الشرادي الصحي كان فيه ممرضه مصريه يوم شافتني قالت يا ويلك اذا جابوك مره ثانيه تعمل خياطه (مسكينه معذبنها)..وفي موقف ما انساه طول حياتي كنا رايحين عايله زياره ازكي واول ما نزلت من السياره بالمره ع المزرعه وكله خمس دقايق والا عاد انا مشلول الصحه علشان يخيطو وجهي والكل مستغرب (مجنون)....

في مرحلة المراهقة:
الكل في هالمرحله تتكون له طاقات عظيمه وعاد كل شخص يوجهها نحو الشي الي في خاطره ويفكر فيه واذا الناس تتجه نحو التطور وذيادة العقل نحن نندمر وندور المشاكل والضرابات والمشاكسه ما ادري ليش واذا احد ينصحنا نقول هذا ما يفهم مع ان نحن الي ما كنا فاهمين الحياه زين واذا تكلمنا عن هذي المرحله لا يوم ولا يومين ولا حتى شهر يكفي لنعبر عنها بس الي اقدر اقوله ان كل الي يمر بي هالمرحله يفكر ان خلاص صار كبير وان ما يحتاح مساعده او نصح من احد مهما كان لان يحب يثبت نفسه بنفسه بس على حسب الي شفته في حياتي اقول ان الي كنا نسويه غلط في غلط والمفروض نسمع كلام الي اكبر منا وخاصه اذا كان ينصحنا لان هو عارف الحياه اكثر منا وعلى قولتهم اسال مجرب ولا تسال طبيب..

في المرحله الي اعيشها الحين الي تعتبر فترة الشباب او بالاحرى هي بعدها فترة المراهقه بس فيها بداية نضج العقل والتوجه نحو الافضل والنظر في كيفية التعامل مع هذي الحياه بجميع اتجاهاتها.. الكل يحاول تكوين نفسه سواء بنفسه او بي مشاركه من الاهل والاقارب والاصدقاء..وتكوين علاقات خارجيه تستفيد منها في تكوين نفسك وفي كيفية مواجهة متطلبات الحياه بحكم ان هؤلاء اكثر خبرة منك....وفي هالايام دخل حياتي انسان حبيته من قلبي صح ما شفته بس ارتحتله كثير واتمنى ان تدوم هالمحبه..

وفي هالمرحله كثير مواقف مرت علي منها المفرحه ومنها المحزنه..
وكل المواقف المحزنه قدرت انساها او اقدر اتناساها الا موقف واحد ابد ما قدرت انساه ولا اظن راح انساه والي هو وفاة انسان عزيز وغالي وغالي وغالي على قلبي من اكثر من خمس سنوات والى الحين وانا اذكره.الله يرحمه ويدخله فسيح جناته..

وبصراحه المواقف المفرحه ما ينعدن يعني كثير منها الي حصلتلي مع الشباب لما نطلع رحلات ومنها الي مع الاهل ...

وهذا الي اقدر اقوله بختصار.....

العضو الي بعدي / العيون الجارحه

يالله انا تو شفت الموضوع لكن عن قريب راح اكتب

لاني تو مشغوله بالمباراه

ححححححححححح

لكن اوعدكم راح اكتب

ححححححححححح